Hanno parlato di noi sul "IL NOTIZIARI' DE CJARGNE - RADON IN FRIÛL: cemût jessi de emergjence

«Il concet di cjase ecologjiche - al à notât Bertossi - al tocje prime di dut la salût de int e e à tant che obietîf chel di protezi i citadins dal chest pericolôs vapôr; in chest sens a 'nd è presse di començâ a doprâ materiâi ecologjics e frontâ il cantin dal sparagn energjetic e, duncje, fâ inovazion e investî di plui». L'imprenditôr Claudio Del Medico Fasano, al à fat il struc de situazion parcè che a rivuarde i 10 mil campionaments gratis che a cjapin dentri dut il teritori dal FVJ (za mil personis a àn domandât di jessi monitoradis a mieç di particolârs struments che a vegnin dal Americhe): «Che il radon al sedi pericolôs e pardabon al rapresenti la tragjedie de nestre regjon, magari cussì no, nol è inmò tignût avonde in cont». Impen su la misurazion dal riscli al à cjacarât Diego Serraino, diretôr de Epidemiologjie dal Cro di Davian e dal Regjistri tumôrs Fvj: «A son 10 mil, i gnûfs câs di tumôrs che a saltin fûr ogni an te nestre regjon. Lis feminis a patissin dal riscli di chest tumôr pal 3 par cent in plui; i oms ai 11 par cent. La esposizion al radon e je dal sigûr cancerogene» al sclarìs Serraino, impensant che il pericul al cres tai fumadôrs. Su chest probleme al à cjacarât ancje il sociolic dal Ateneu furlan, Bruno Tellia: «Si scuen inviâ une precise strategjie comunicative: di mût che cui che al scolte al sedi atent al messaç radon e a ‘nd è dibisugne che chest al sedi inviât inte maniere juste».